"Visits by outside leaders causing more tension in Mangalore"

busy calculating...

Mangalore: violence tourism destination for "Intellectuals", Jobless Politicians, self proclaimed human rights activists?

an analysis by Manohar Prasad, Udayavani

ಮಂಗಳೂರು, ಸೆ. 17: ದ.ಕನ್ನಡ ಮತ್ತು ಉಡುಪಿ ಜಿಲ್ಲೆಗಳಲ್ಲಿ ಕಳೆದ ಭಾನುವಾರದ ಅನಪೇಕ್ಷಿತ ಘಟನೆಯೊಂದರ ಗಾಯ ವನ್ನು ಜನಮಾನಸ ಮರೆಯಲು ಯತ್ನಿಸುತ್ತಿದೆ. ಆದರೆ, ಈ ಗಾಯವನ್ನು ಮತ್ತೆ ಮತ್ತೆ ಕೆದಕುವ ಪ್ರಯತ್ನ ನಡೆಯುತ್ತಿರುವಂತೆ ಕಳೆದ ಎರಡು ದಿನಗಳ ಬೆಳವಣಿಗೆಗಳಿವೆ.

ಮಂಗಳೂರು ಮತ್ತದರ ಹೊರವಲಯಗಳಲ್ಲಿ ಭಾನುವಾರ ಮತ್ತು ಸೋಮವಾರ ಹಿಂಸಾಚಾರದ ಘಟನೆಗಳ ಸರಣಿ ಸಂಭವಿಸಿತು. ಉಡುಪಿ, ಚಿಕ್ಕಮಗಳೂರು ಮುಂತಾದ ಜಿಲ್ಲೆಗಳಲ್ಲಿಯೂ ಕ್ರೈಸ್ತರ ಪ್ರಾರ್ಥನಾ ಮಂದಿರಗಳಿಗೆ ದಾಳಿ ನಡೆಸಲಾಗಿತ್ತು. ಬಳಿಕ ಕ್ರೈಸ್ತ ಸಂಘಟನೆಗಳ ಭಾರೀ ಪ್ರತಿಭಟನೆ ಮಂಗಳೂರು ಮತ್ತು ಪರಿಸರದಲ್ಲಿ ಸಂಭವಿಸಿತು.
ಬಂಟ್ವಾಳ, ಪುತ್ತೂರು, ಬೆಳ್ತಂಗಡಿ, ಸುಳ್ಯಗಳಲ್ಲಿಯೂ ಕೆಲವು ಪ್ರಕರಣ ವರದಿಯಾದವು. ಬಿ.ಸಿ. ರೋಡ್, ಕಲ್ಲಡ್ಕದಲ್ಲಿ ಪ್ರಕರಣದ ಸಂದರ್ಭವು ಬೇರೆ ತಿರುವುಗಳನ್ನು ಪಡೆದು ಕೊಂಡಿತು. ಇಂತಹ ಒಂದು ತಿರುವು ಮಂಗಳವಾರದ ಬಂದ್‌ಗೆ ಕಾರಣವಾಯಿತು.

ಏನಿದ್ದರೂ, ಬುಧವಾರ ಮಂಗಳೂರು ಸಹಿತ ದ.ಕನ್ನಡ ಜಿಲ್ಲೆ ವಸ್ತುಶಃ ಯಥಾಸ್ಥಿತಿಗೆ ಮರಳಿದೆ. ದಾಳಿ ಮತ್ತು ಪ್ರತಿಭಟನೆ ಇವೆರಡರ ಜತೆಯಲ್ಲಿ ಭುಗಿಲೆದ್ದ ಹಿಂಸಾಚಾರಗಳ ಬಗ್ಗೆ ಆತ್ಮಾವಲೋಕನಕ್ಕೆ ಇದು ಸರಿಯಾದ ಸಂದರ್ಭವಾಗಿತ್ತು.

ಆದರೆ, ಕಳೆದೆರಡು ದಿನಗಳಲ್ಲಿ ಇಲ್ಲಿ ಕದಡಿದ ನೀರಿನಲ್ಲಿ ಮೀನು ಹಿಡಿಯುವ ಪ್ರಯತ್ನ ಕೆಲವರಿಂದ ನಡೆಯುತ್ತಿದೆ.

ಭಾವನಾತ್ಮಕ ಹಾನಿ
ಸೌಹಾರ್ದ ಮತ್ತು ಸಾಮರಸ್ಯಕ್ಕೆ ಜಿಲ್ಲೆಯ ಪರಂಪರೆ ಅನನ್ಯವಾಗಿದೆ. ಹಾಗೆಂದು, ಇಲ್ಲಿ ಮತೀಯ ಘರ್ಷಣೆಗಳು ನಡೆದಿಲ್ಲವೆಂದಲ್ಲ. ಹಿಂಸಾತ್ಮಕ ಪ್ರಕರಣಗಳು ಸಂಭವಿಸಿಲ್ಲ ಎಂದಲ್ಲ. ಅಂತಹ ದುರದೃಷ್ಟಕರ ಪ್ರಸಂಗಗಳ ಸಂದರ್ಭದಲ್ಲಿ ಇಲ್ಲಿಯ ಜನತೆ ಶಾಂತಿಗಾಗಿ ಶ್ರಮಿಸಿದ್ದಾರೆ; ಯಶಸ್ವಿಯಾಗಿದ್ದಾರೆ.

ಆದರೆ, ಈ ಬಾರಿಯ ಪ್ರಸಂಗ ಸಂಪೂರ್ಣ ಭಿನ್ನವಾಗಿತ್ತು. ಒಂದೆರಡು ಅವಾಸ್ತವಿಕ ತಿಳುವಳಿಕೆಯು ಸ್ಫೋಟಕ ಪರಿಸ್ಥಿತಿಗೆ ಕಾರಣವಾಯಿತು. ಅದೃಷ್ಟವಶಾತ್ ಇಲ್ಲಿ ಜೀವಹಾನಿ ಅಥವಾ ಭಾರೀ ಪ್ರಮಾಣದ ಆಸ್ತಿ ಹಾನಿ ಸಂಭವಿಸಲಿಲ್ಲ. ಭೌತಿಕವಾದ ಹಾನಿಗಿಂತ ಭಾವನಾತ್ಮಕವಾದ ಹಾನಿಯೇ ಹೆಚ್ಚಾಗಿತ್ತು. ಕಾನೂನನ್ನು ಕೈಗೆತ್ತಿಕೊಂಡ ಎಲ್ಲರ ಮೇಲೆ ಕಾನೂನು ಕ್ರಮ ಜರಗಿಸಬೇಕು.

ಈ ವಾಸ್ತವವನ್ನು ಅರಿಯದ ಅನೇಕ ರಾಷ್ಟ್ರೀಯ-ರಾಜ್ಯ ಇತ್ಯಾದಿ ಬಿರುದಾಂಕಿತ ನಾಯಕರು ಈಗ ಮಂಗಳೂರನ್ನು ತಮ್ಮ ಪ್ರವಾಸೀತಾಣ ವನ್ನಾಗಿ ಮಾಡಿಕೊಂಡಿದ್ದಾರೆ. ಸತ್ಯಸಂಗತಿ ಶೋಧಿಸಲು ಎಂದು ಬರುತ್ತಿರುವವರು ಕಣ್ಣು ಮತ್ತು ಕಿವಿಗಳನ್ನು ಮುಚ್ಚಿಕೊಂಡ ಸ್ಥಿತಿಯಲ್ಲಿ ತಿರುಗಾಟ ನಡೆಸಿದ್ದಾರೆ. ಓಲೈಕೆಯ ಭರಾಟೆಯಲ್ಲಿ ವಾಸ್ತವಗಳನ್ನು ತಿಳಿದುಕೊಳ್ಳದೆ ಉರಿಯುವ ಬೆಂಕಿಗೆ ತುಪ್ಪ ಹಾಕುವ ಸನ್ನಾಹದಿಂದಲೇ ಬಂದಿದ್ದಾರೆ. ಕರಾವಳಿಯ ಅದೃಷ್ಟದಿಂದಾಗಿ ಈ ಮಹನೀಯರು ಬರುವುದಕ್ಕೆ ಮೊದಲೇ ಇಲ್ಲಿ ಅಗ್ನಿಶಮನಗೊಂಡಿದೆ. ಏಕೆಂದರೆ, ಈ ಕರಾವಳಿಯ ಜಿಲ್ಲೆಗಳು ರೂಪು ಗೊಂಡಿ ರುವುದು ಸರ್ವ ಜನಾಂಗಗಳಿಂದ, ಸರ್ವರ ಕೊಡುಗೆಗಳಿಂದ.

ಚುನಾವಣೆಯ ದೃಷ್ಟಿ ?
ಲೋಕಸಭಾ ಚುನಾವಣೆಯು ಸಮೀಪಿಸುತ್ತಿದೆ. ಆದ್ದರಿಂದಲೇ ವಿವಿಧ ರಾಜಕೀಯ ಪಕ್ಷಗಳವರು ಇಲ್ಲಿ ಮೊಸಳೆ ಕಣ್ಣೀರು ಸುರಿಸಲು ಧಾವಿಸುತ್ತಿದ್ದಾರೆ ಅನ್ನುವುದು ಸ್ಪಷ್ಟ. ಇಲ್ಲಿಯ ಜನ ಅದನ್ನು ಅರಿತವರೇ ಆಗಿದ್ದಾರೆ.

ಇಲ್ಲಿಯ ಸಮಸ್ಯೆಗಳ ಪರಿಹಾರವನ್ನು ಇಲ್ಲಿನವರೇ ರೂಪಿಸಿಕೊಳ್ಳಲು ಶಕ್ತರಿದ್ದಾರೆ. ಲೋಕಸಭೆಗೆ ಓರ್ವ ಸ್ಪೀಕರ್, ಕೇಂದ್ರ ಸರಕಾರಕ್ಕೆ ಏಳು ಮಂದಿ ಮಹತ್ವದ ಖಾತೆಗಳ ಸಚಿವರು, ಕರ್ನಾಟಕಕ್ಕೆ ಓರ್ವ ಮುಖ್ಯಮಂತ್ರಿ, ಅನೇಕಾನೇಕ ಸಚಿವರನ್ನು ನೀಡಿದ ಜಿಲ್ಲೆ ಇದು. ಇಲ್ಲಿಯ ಸೂಕ್ಷ್ಮಗಳನ್ನು ಅವರು ಬಲ್ಲವರು. ಇಲ್ಲಿಯ ಜನಪ್ರತಿನಿಧಿಗಳಲ್ಲಿ ಈಗಲೂ ಕೇಂದ್ರ-ರಾಜ್ಯಗಳ ಸಚಿವರುಗಳಿದ್ದಾರೆ. ರಾಜಕೀಯ ಪರಿಹಾರವನ್ನು ಒದಗಿಸುವ ಸಾಮರ್ಥ್ಯ ಅವರಿಗಿದೆ.

ಎಲ್ಲಿಂದಲೋ ಬಂದವರು !
ಈಗ ಸಮಸ್ಯೆಯನ್ನು ಉಂಟು ಮಾಡುತ್ತಿರುವವರು ಎಲ್ಲಿಂದಲೋ ಬಂದವರು. ಈ ರೀತಿ ಬರುತ್ತಿರುವವರೇ ಈಗ ಶಾಂತಿ ಪ್ರಕ್ರಿಯೆಗೆ ಒಂದಿಷ್ಟು ತೊಡಕುಂಟು ಮಾಡುತ್ತಿದ್ದಾರೆ ಅನ್ನುವುದನ್ನು ಗಮನಿಸಬಹುದಾಗಿದೆ.

ಪರಿಹಾರ ನೀಡಲು, ಕಾನೂನು ಕ್ರಮ ಕೈಗೊಳ್ಳಲು ಸರಕಾರವಿದೆ. ಸರಕಾರ ಆ ನಿಟ್ಟಿನಲ್ಲಿ ಸ್ಪಂದಿಸುತ್ತಿದೆ. ಆ ಕುರಿತು ಲೋಪವಿದ್ದರೆ, ಶಾಸನಸಭೆಗಳಲ್ಲಿ ಮಾತನಾಡಬೇಕಾದವರು ಇಲ್ಲಿ ಬಂದು ರಾಡಿ ಎಬ್ಬಿಸುವುದೇಕೆ? ಮತ್ತಷ್ಟು ಗೊಂದಲಗಳನ್ನು ಉಂಟು ಮಾಡುವುದೇಕೆ?

ಮಂಗಳವಾರ ಭೇಟಿ ನೀಡಲು ಬಂದ ನಾಯಕರೋರ್ವರು ಸಾರ್ವಜನಿಕರಿಂದ ಮುತ್ತಿಗೆ ಎದುರಿಸಬೇಕಾಯಿತು. ಅವರು ಪಕ್ಷಪಾತದ ಧೋರಣೆ ಅನುಸರಿಸಿದರು. ಕೆಲವರ ಅಹವಾಲು ಮಾತ್ರ ಕೇಳಿದರು. ಇತರರನ್ನು ನೋಡಲು ಕೂಡ ನಿರಾಕರಿಸಿದರು. ಹಾಗಿದ್ದರೆ, ಇಂತಹ ಭೇಟಿ ಯಾವ ಪುರುಷಾರ್ಥಕ್ಕೆ ಎಂಬ ಪ್ರಶ್ನೆಯನ್ನು ಅವರು ಎದುರಿಸ ಬೇಕಾಯಿತು. ಆದ್ದರಿಂದ, ಆ ನಾಯಕರ ವರ್ತನೆ ಪ್ರಜಾತಾಂತ್ರಿಕ ವ್ಯವಸ್ಥೆಗೆ ಪೂರಕವೇ ಎಂಬ ಪ್ರಶ್ನೆ ಉದ್ಭವಿಸುತ್ತದೆ.

ಜಿಲ್ಲೆಯಲ್ಲಿ ಶಾಂತಿ ನೆಲೆಸುತ್ತಿದೆ. ಉಸ್ತುವಾರಿ ಸಚಿವರ ನೇತೃತ್ವದಲ್ಲಿಂದು ಶಾಂತಿ ಸಭೆ ನಡೆದಿದೆ. ಸೆ. 14 ಮತ್ತು 15ರ ಘಟನೆಗಳು ಪುನರಾವರ್ತನೆ ಆಗಬಾರದು ಎಂಬ ಕಳಕಳಿ ವ್ಯಕ್ತವಾಗಿದೆ. ನಡೆದುಹೋದ ದುರ್ಘಟನೆಯನ್ನು ಕೆಟ್ಟ ಕನಸು ಎಂದು ತೊಡೆದು ಹಾಕಲು ಸಾಧ್ಯವಿಲ್ಲವೇ?

Courtesy: Udayavani, reproduced from Gulfkannadiga

===================================

Amicable settlement of issues: Local problems settled locally, much to the dismay of "those fishing in troubled waters"